【我依家先知原來做兵唔係最慘，仲有個新term：奴才】
月頭有位巴打出post問大家佢係兵定男朋友.....其實佢咁問得出，都知道自己比人玩緊啦係咪？所以大家一致留言話佢分明係做緊兵，根本唔使問。不過循例都要睇下佢同娘娘既WhatsApp對話既，唔睇都仲好啲，一睇，嘩簡直係人神共憤，真頭想嗌佢：「食屎啦你！」
對話裡面巴打就問娘娘佢究竟係男朋友定係兵，點知娘娘竟然答左三個字「係奴才」。當巴打繼續死心不息覺得佢自己係男朋友嗰陣，對方再講：「係一個掛名男朋友，實際係奴才。」正常人見到中意既人咁講都如同千刀萬剮咁架啦，點知呢個巴打仲要再話「但係感覺好似一齊左都仲係普通friend呀嘛。」
我依家終於知道點解有咁多精神失常既娘娘穿越時空黎到呢度，原來就係有呢班所謂既奴才縱出黎。其實人地經病得好嚴重，為何仲要配合佢令佢癲上加癲呢？面係人地比，架係自己丢，身係一個男人竟然為左娘娘降到奴才level....做兵都話有時有軍糧派下，可以一親娘娘芳澤，算係付出有成果既，唔係好成比姐；但依家做奴才係乜X都要做，冇得say no！
有啲人就話會唔會係女朋友想玩cosplay咋？cos鬼cos馬咩，玩就真，cosplay就用黎點佢繼續為自己服務既藉口黎啫。如果真係女朋友，巴打就唔會講到佢地同普通朋友做既野冇分別啦。我大膽假設佢地話就話一齊左，但甚至連手都冇拖過、嘴都冇錫過呀。
做人定做兵有時真係有得揀，只係睇你夠唔夠決絕，唔少港男就係唔夠定力，搞到自己又求又淨，乜野尊嚴早就冇曬啦。
拿就係咁樣，呢一名意亂情迷既男人就比嗰名女子搞到暈曬大浪，比人偷左野都唔知。最近紙情收到市民舉報，佢地大部份都係冇拍過拖既年輕男子，佢地聲稱自己係男朋友，實則就比該名女子趁機偷取佢地既尊嚴。喺度想呼籲大家，特別係各位男子，正所謂「色字頭上一把刀」，千祈就唔好因為有女子主動要求一齊就得意忘形。最後就想呼籲各位，如果你地曾經遇上類似事件，請你地千祈唔好怕尷尬而唔post上討論區，因為如果你地咁做只會縱容嗰啲不法之徒繼續犯案架咋。
Search